ក្រុមប្រាសាទសំបូរព្រៃគុក ជាក្រុមប្រាសាទធំៗចំនួន៣ និងប្រាសាទដទៃទៀតដែលស្ថិតនៅតែឯង ឬជាក្រុម (ឧទាហរណ៍ ក្រុមប្រាសាទរបងរមាស)។ បើយើងពិនិត្យមើលផែនទីខាងក្រោម យើងនឹងឃើញថា ក្រុមប្រាសាទធំៗទាំង៣ គឺស្ថិតនៅខាងកើតនៃអូរមួយហៅថា អូរគ្រូកែ ឯនៅខាងលិចអូរនោះជាក្រុងបុរាណដែលមានកំពែងមួយជាន់ព័ទ្ធពីបីទិស និងមានគូទឹករត់ស្របកំពែងនោះ។ ជាទូទៅ សំណង់ភាគច្រើននៅទីនេះកសាងនៅសតវត្សទី៧ តែក៏អាចមានសំណង់កសាងនៅពេលក្រោយដែរ បើផ្នែកតាមបដិមាសាស្ត្រ និងសិលាចារឹក។ ក្នុងប្រកាសនេះ ខ្ញុំនឹងសសេរត្រួសៗ ដោយបង្ហាញតែប្រាសាទធំៗនៃក្រុមទាំងបីនេះប៉ុណ្ណោះ ឯប្រាសាទដទៃទៀតនឹងមានផ្សាយនៅប្រកាសក្រោយៗ។
ក្រុមប្រាសាទសំបូរ តាងដោយអក្សរ (N-Northern Group) មានកំពែងពីរជាន់ (បន្ទះថ្មភក់សង់លើរបងឥដ្ឋនៅកំពែងខាងក្នុង និងថ្មបាយក្រៀមនៅកំពែងខាងក្រៅ) និងគូទឹកមួយជាន់ទៀត។ នៅក្នុងកំពែងខាងក្នុងនេះមានប្រាសាទ៥ ក្នុងនោះមានប្រាសាទតែមួយគត់ដែលមានរាងអដ្ឋកោណ (៨ ជ្រុង)។ នៅចន្លោះកំពែងខាងក្នុង និងកំពែងថ្មបាយក្រៀមមានប្រាសាទ៥ទៀត ឯនៅចន្លោះកំពែងថ្មបាយក្រៀម និងគូទឹកមានប្រាសាទជាច្រើនទៀតដែលនៅសល់រូបរាងល្អ។ ខាងក្រោមនេះជារូបប្រាសាទដែលគេតាងដោយ N1 នៅលើខឿនធំមួយ និងមានប្រាសាទរណបនៅតាមទិសតូចៗទាំងបួន។ ប្រាសាទនេះមានទំហំធំជាងប្រាសាទដទៃហើយមានទ្វារចូលពីគ្រប់បួនទិស តែគួរឱ្យសោកស្ដាយព្រោះកំពូលប្រាសាទបានបាក់រលំអស់ទៅហើយ។
ក្រុមប្រាសាទតោ តាងដោយអក្សរ (C-Central Group) មានកំពែងថ្មបាយក្រៀមព័ទ្ធជុំវិញពីរជាន់។ សព្វថ្ងៃនៅមានតែប្រាសាទ C1 ទេដែលនៅសល់រូបរាង ក្រៅពីនេះរលំអស់ក្លាយជាទួលអស់ទៅហើយ។ ប្រាសាទ C1 បែរមុខទៅទិសខាងកើត និងមានទ្វារបញ្ឆោតពីគ្រប់៣ទិសដទៃទៀត។ នៅខាងកើតដដែលនោះ នៅអមសងខាងជណ្ដើរឡើងទៅប្រាសាទ យើងឃើញមានតោថ្មមួយគូឈរស្ទើរអង្គុយ ដែលជាមូលហេតុនាំឱ្យគេហៅប្រាសាទនេះថាប្រាសាទតោ។ តាមការពិនិត្យត្រួសៗ តោឆ្មាំនេះគួរមានដល់ទៅ៨ (?) ព្រោះយើងឃើញសំណល់ជើងតោនៅលើជើងទម្រនៅតាមច្រកទ្វារបញ្ឆោតផ្សេងទៀត។
ក្រុមប្រាសាទយាយព័ន្ធ តាងដោយអក្សរ (S-Southern Group) មានកំពែងពីរជាន់ (កំពែងខាងក្នុងជាឥដ្ឋ និងកំពែងខាងក្រៅជាថ្មបាយក្រៀម)។ នៅក្នុងកំពែងខាងក្នុងមានប្រាសាទសរុប៧ ក្នុងនោះប្រាសាទ៥មានរាងប្រាំបីជ្រុង។ ប្រាសាទ S1 មានរាងបួនជ្រុង នៅល្អជាងគេ បែរទៅខាងកើត និងមានទ្វារបញ្ឆោតពីគ្រប់៣ទិសដទៃទៀត។ នៅខាងមុខនោះ មានប្រាសាទមួយធ្វើពីឥដ្ឋ (តាងដោយលេខ S2) ធ្វើគ្របលើសំណង់មួយសណ្ឋានជារោងធ្វើពីថ្មភក់។ បើតាមសិលាចារឹកគគេមានតម្កល់ «ព្រះគោប្រាក់» មួយនៅក្នុងនោះ។
វីដេអូអបអរខួបពីរឆ្នាំនៃការចុះបញ្ជីតំបន់ប្រាសាទសំបូរព្រៃគុក ជាសម្បត្តិបេតិកភណ្ឌពិភពលោករបស់អង្គការយូនេស្កូ ថ្ងៃទី០៨ ខែកក្កដា ឆ្នាំ២០១៧៖
UNESCO: Temple Zone of Sambor Prei Kuk, Archaeological Site of Ancient Ishanapura