ភ្នំបូក ជាភ្នំមួយក្នុងចំណោម ភ្នំទាំង ៣ នៃ យសោធរបុរៈ ។ ភ្នំ ២ ផ្សេងទៀត គឺ ភ្នំក្រោម និងភ្នំបាខែង ។ នៅលើកំពូលភ្នំនេះ មានប្រាសាទមួយដែលមានប្រាង្គធំ ៣ ដែលមានទំហំប៉ុនគ្នាសង់លើខឿនថ្មភក់ ១ និង ប្រាសាទតូចៗ ចំនួន ៤ (ធម្មសាលា) ធ្វើអំពីថ្មភក់ ២ និងឥដ្ឋ ២ បែរមុខទៅរកប្រាង្គធំទាំង ៣ ។ ប្រាង្គធំៗ ទាំង ៣ នេះ ប្រាង្គកណ្ដាលកសាងដើម្បីឧទ្ទិសដល់ ព្រះសិវៈ, ប្រាង្គខាងជើងឧទ្ទិសដល់ព្រះវិស្ណុ និងប្រាង្គខាងត្បូងឧទ្ទិសដល់ព្រះព្រហ្ម ។ ក្នុងន័យសាសនា ប្រាសាទភ្នំបូក ដែលត្រូវបានស្ថាបនាក្នុងរាជ្យ ព្រះបាទយសោវម៌្មទី ១ (889 – 899) ស្ថិតក្នុងរចនាបថបាខែង បានធ្វើឲ្យប្រជានុរាស្ត្រគ្រប់លំដាប់ថ្នាក់ទទួលបានការពារពី អាទិទេព ត្រីមូតិ (ព្រះព្រហ្ម ព្រះវិស្ណុ និងព្រះសិវៈ) និងជាសញ្ញានៃការឯកភាពជាតិយ៉ាងរឹងមាំ ។
នៅពេលដែល ព្រះបាទយសោវម៌្មទី ១ ទ្រង់ជ្រើសរើសរកទីទួលខ្ពស់មួយសម្រាប់ធ្វើជាស្នូលរាជធានីក្នុងន័យសាសនា ព្រះអង្គបានជ្រើសរើសយក ភ្នំបាខែង ក៏ដោយសារ ភ្នំបូក ស្ថិតនៅឆ្ងាយពីប្រភពទឹក (ទន្លេសាប) និងមានកម្ពស់ខ្ពស់ (២២១ ម៉.) ឯ ភ្នំក្រោម វិញស្ថិតនៅជិតនឹងប្រភពទឹក (ទន្លេសាប) ពេក ។ ម៉្យាងវិញទៀត ភ្នំបាខែង មានកម្ពស់ទាបល្មម និងស្ថិតនៅចំកណ្ដាលភ្នំទាំង ២ ។ ផ្ទុយពី ប្រាសាទភ្នំបាខែង ដែលកសាងដើម្បីឧទ្ទិសដល់ ព្រះសិវៈ ក្នុងរូបភាពជា លិង្គ ដែលមាននាមថា យសោធរេស្វរៈ ប្រាសាទភ្នំបូក និងប្រាសាទភ្នំក្រោមត្រូវបានកសាងដើម្បីឧទ្ទិសដល់ អាទិទេព ត្រីមូតិ ។ ប្រាសាទភ្នំបូក និងប្រាសាទភ្នំក្រោម មានប្លង់គំរូដូចគ្នាបេះបិទ ដោយគ្រាន់តែ ប្រាង្គកណ្ដាលនៃប្រាសាទភ្នំក្រោម ធំជាងប្រាង្គទាំង ២ ដែលអមសងខាង ។ ព្រះកេសបដិមា ត្រីមូតិ ត្រូវបាន លោក Louis Delaporte នាំយកទៅស្រុកបារាំងនៅឆ្នាំ ១៨៧៣ ហើយសព្វថ្ងៃតម្កល់ទុកនៅសារមន្ទីរ Guimet ។
| ព្រះព្រហ្ម | ព្រះវិស្ណុ | ព្រះសិវៈ |
 |
 |
 |
បច្ចុប្បន្ន ប្រាសាទភ្នំបូក ស្ថិតក្នុងសភាពបែកបាក់ជាដំណំ ។ កំពូលនៃប្រាង្គកណ្ដាល និងប្រាង្គខាងត្បូងបានបាក់ធ្លាក់ចុះ និងរាយប៉ាយពេញទីធ្លា ។ ឯប្រាង្គខាងជើង ទោះជាស្ថិតក្នុងសភាពប្រសើរជាងប្រាង្គទាំង ២ ទៀតក៏ដោយ ក៏មានការខូចខាតជាច្រើនផងដែរ ។ ធម្មសាលា ២ ដែលធ្វើអំពីឥដ្ឋ បានបាក់បែកខូចអស់ទៅហើយ ចំណែកឯ ធម្មសាលា ២ ទៀតដែលធ្វើអំពីថ្មភក់ស្ថិតក្នុងសភាពទ្រុឌទ្រោម ដោយសារតែមានដើមផ្កាចំប៉ី ដុះចំពីលើ ធម្មសាលា ទាំង ២ នេះ ។ ឯកំពែងថ្មបាយក្រៀម និងគោរបុរៈទាំង ៤ បានខូចខាតបាត់បង់អស់ទ្រង់ទ្រាយដើម ។
នៅជ្រុងអាគ្នេយ៍ គោរបុរៈ ខាងកើតមានវិហារពុទ្ធសាសនាមួយដែលត្រូវបានគេស្ថាបនាមកថ្មី ប្រហែលជាក្រោយសង្គ្រាមស៊ីវិល ប៉ុន្តែបច្ចុប្បន្នពុំមានព្រះសង្ឃគង់នៅនោះទេ ដោយគេបានរើវត្តទៅជើងភ្នំវិញ ងាយស្រួលសម្រាប់ចាស់សុំសមាទានសីល ដោយមិនចាំបាច់ឡើងចុះភ្នំច្រើនដង នាំឲ្យមានផលវិបាក ។
-
- ប្រាង្គធំទាំង ៣
-
- ប្រាង្គធំទាំង ៣
-
- ប្រាង្គធំទាំង ៣ មើលពីក្រោយ
-
- ប្រាង្គខាងជើង
-
- ប្រាង្គកណ្ដាល
-
- ប្រាង្គខាងត្បូង
-
- ធម្មសាលា និងដើមផ្កាចំប៉ី
-
- ធម្មសាលា និងដើមផ្កាចំប៉ី
-
- កូនប្រាសាទតំណាងដែលទូទៅដាក់បណ្តុបនៅលើប្រាសាទ
-
- ស្រីទេពអប្សរ
-
- ស្រីទេពអប្សរ
-
- ទ្វារបញ្ឆោត
-
- ទិដ្ឋភាពពីទិសខាងត្បូង
-
- វិហារពុទ្ធសាសនាសម័យថ្មី
-
- តោឆ្មាំ
***
អានផងដែរ ៖ កម្សាន្តភ្នំបូក
តាម៉ាប់ យាយម៉ាប់ 
ស្តាប់ទៅចេះប្រវត្តសាស្ត្រជាងប្រវត្តវិទូ មីសែល ត្រាណេទៅទៀត។ គួរអោយសរសើរមែនៗ!
ទេ ទៅមិនដល់លោកគ្រូមីសែល ត្រាណេ ទេ ។ ត្បិតខ្ញុំមិនដែលបានសិក្សាផ្នែកប្រវត្តិសាស្ត្រឲ្យចំ និងមិនដែលសិក្សាក្រោមការបង្រៀនរបស់គាត់ ខ្ញុំចាត់ទុកគាត់ជាគ្រូធំមួយដែល អត្ថបទខ្លី និងសៀវភៅជាច្រើនរបស់គាត់បានជម្រុញ និងទាក់ចិត្តខ្ញុំឲ្យជាប់នឹងរឿងប្រវត្តិសាស្ត្រ ។ លោកគ្រូគាត់ចេះវិភាគ ចេះវាយតម្លៃ និងចេះសន្និដ្ឋានបានយ៉ាងល្អ ផ្ទុយទៅវិញខ្ញុំដឹងតែគោលៗ សើៗ នោះទេ ។
Pingback: ប្រាសាទកុដិស្វរៈ | តាម៉ាប់ យាយម៉ាប់
Pingback: មហាលិង្គ ភ្នំបូក | តាម៉ាប់ យាយម៉ាប់
Pingback: បួនខែនៅ អង្គរ | តាម៉ាប់ យាយម៉ាប់
នេះជាការចែករំលែកចំណេះដឹងអោយកូនខ្មែរដទៃទៀត
Pingback: ព្រះត្រីមូត៌ិ នៃភ្នំបូក | តាម៉ាប់ យាយម៉ាប់