ធ្វើបច្ចុប្បន្នភាព ៖ ប្រាសាទស្នឹងលិច

ខ្ញុំសរសេរប្រកាសនេះដើម្បីធ្វើបច្ចុប្បន្នភាពពីប្រកាសមុនដែលសរសេរពី ប្រាសាទស្នឹងកើត-លិច ដោយសារទទួលឃើញឯកសារថ្មីមួយ ។ ប្រកាសនេះនិយាយអំពីក្បាច់ចម្លាក់នៅលើ ផ្ដែរ នៃប្រាសាទស្នឹងលិច ។

១. ផ្ដែរទិសខាងកើត ៖ មានចម្លាក់រឿងកូរសមុទ្រទឹកដោះ ។

កូរសមុទ្រទឹកដោះ កាលព្រះវិស្ណុបំលែងខ្លួនទៅជាអណ្ដើកកូម៌ៈ

កូរសមុទ្រទឹកដោះ កាល ព្រះវិស្ណុ បម្លែងខ្លួនទៅជា អណ្ដើកកូម៌ៈ

២. ផ្ដែរទិសខាងលិច ៖ ព្រះវិស្ណុផ្ទំលើគជសីហ៍នៅកណ្ដាល ព្រះព្រហ្មគង់លើផ្កាឈូកដែលផុសចេញពីផ្ចិត ព្រះវិស្ណុ, ឯនៅចុងជើង ព្រះវិស្ណុ មានស្ត្រីពីរនាក់, ស្ត្រីទីមួយ គឺព្រះនាងលក្ស្មី ⁽¹⁾ ជាមហេសីធំដែលគេតែងតែឃើញ និងម្នាក់ទៀតប្រហែលជា ព្រះនាងភូទេវី ជាមហេសីបន្ទាប់ ។ រឿងនេះសូមបន្ថែមទៀត ដោយសារមានរឿង ២ ផ្សេងទៀតនៅលើផ្ដែរតែមួយ ។ នៅខាងឆ្វេង ចម្លាក់ជារូបព្រះវិស្ណុ ឈាន ៣ ជំហានយកចក្រវាល (ព្រាហ្មណ៍តឿ វាមនៈ ដែលសុំដីយក្ស ៣ ជំហាន) ។ ឯនៅខាងស្ដាំ ប្រហែលជា រូបព្រះក្រិស្នា សម្លាប់នាគកលិយៈ និងសត្វបិសាចផ្សេងៗ ដែល ស្ដេចកាំសៈ ជាមារបញ្ជូនមកសម្លាប់ ។ ⁽²⁾

(ឆ្វេង) – ព្រះវិស្ណុ ឈាន ៣ ជំហានយកចក្រវាល (កណ្ដាល) – ព្រះវិស្ណុ ផ្ទំលើ គជសីហ៍? (ជាទូទៅលើ នាគអនន្តៈ) (ស្ដាំ) – ព្រះក្រិស្នា សម្លាប់នាគ កលិយៈ និងសត្វបិសាច

៣. ផ្ដែរទិសខាងត្បូង ៖ ចម្លាក់រូបសត្វតោ ៣ក្បាលកំពុងតែទ្រមនុស្ស (ឬទេវតា) ដែលកំពុងលេងចត្រង្គ (សរសេរលើកមុន) ។ ជាការពិតផ្ដែរនេះនិយាយអំពីឈុតមួយក្នុង រឿងមហាភារតៈ ត្រង់ពួកបាណ្ឌភ (នៅខាងឆ្វេងមាន ៖ យុធិស្ឋិរ, ភីម, អជ៌ុន, នកុល និងសហេទេវ តាមលំដាប់ពីបងទៅប្អូន) លេងឡុកឡាក់ ⁽³⁾ និង ពួកកោរព (នៅខាងឆ្វេងមាន ៖ ទុយ៌ោធន, សកុនី ជាពូ និង ទុហសាសនៈ ជាប្អូន), ពួកបាណ្ឌភ ចាញ់អស់ទាំងវាំង ទាំងនគរ ទាំងខ្លួន ឯនាងទ្រៅបទី ជាភរិយា ក៏ត្រូវ ទុហសាសន សម្រាតសំពត់ទៀត ។ ⁽⁴⁾

បញ្ជាក់ផងដែរថា រឿងមហាភារតៈ នេះជារឿងចម្បាំងធំមួយដូចនឹង រឿងរាមកេរ្តិ៍ ដែរ ខ្មែរសម័យអង្គរឮជ្រួតជ្រាបរឿងនេះណាស់ លុះសម័យក្រោយមកបែរជាភ្លេចភ្លាំងអស់រលីង ។ ពួកបាណ្ឌភ មាន ៥ នាក់បងប្អូន ៖ យុធិស្ឋិរ (ជាអ្នកធ្ងន់ក្នុងសច្ច និងមានសទ្ធាជ្រះថ្លា), ភីម (មានកម្លាំងមហិមា), អជ៌ុន/អរជុន (ជាអ្នកចម្បាំងមានថ្វីដៃ), នកុល និង សហទេវ/សហទេព ជាកូនភ្លោះ ។ ឯពួកកោរពមានបងប្អូន ១០០ នាក់ ដែលមាន ទុយ៌ោធន/ទុរយោធន ជាបងបង្អស់ ។